唔使急，最緊要快

《唔使急，最緊要快》

簡單而言，講既人擺出一個「唔使急」既大仁大義姿態，來催促對方做野，又自以為幽默風趣。

只是不知道，聽的人是否討厭就是了。我是「討厭」的一派，所以我從不用呢種片語。

「唔使急」係心態。辦事急，就難免出錯，無論做得幾快都冇用，俗語就係「那西*」、「求其」、「是但」，就算趕得出貨，都會「零分重做」。

「最緊要快」又係咩意思？半個鐘？半日？抑或半個月？可見呢四個字其實好主觀，佢甚至唔係一個標準。講既人如果訂立了交貨死線，呢句「最緊要快」則變了廢話。

整句話，上文下理似是矛盾，不過想深一層又未必是。

「唔使急」可以轉化成「唔好那西」，在這個前題下盡快吧！

當然，我唔信有好多人，講既時候會咁理解，因為，好多人收貨時，都仲會笑住口同你講：「『終於』見到份野既蘆山真面目了。」而不會講聲「有勞」。

（*註：那西，廣東話，但唔好亂用，尢其係對住竹昇妹。）





《語音功能》

係呢個「唔使急，最緊要快」既社會，直接打電話搵唔到人（因為人地可能做緊其他野，而唔係坐係度等電話），最好就係用即時通訊軟件（通常係Whatsapp）留口訊，一來唔會之後唔記得，二來又唔使花時間聯絡多次。

科技永遠都係便利人類，搞到唔便利既永遠都係人類自己。

有一種上司，心血來潮醒起要做一件事，就會夜媽媽傳個Whatsapp俾你（隨時佢自己都係床上傳的）。咁都唔算衰，更衰既，佢唔係打字俾你，而係錄音俾你。

咁你都訓著左啦，又點會知道？第二朝趕車返工，又唔會睇啦。係你上晝魂魄未齊，果位上司就經已問你尋晚個留言搞成點。跟住，你一打開Whatsapp，見到既係十、九幾個語音，每段三分鐘。聽晒都要半個鐘，仲要唔知去邊度搵個位坐定定先聽得清楚。

「我之前講得好清楚架啦！你冇睇口訊架咩？」

我有睇，係冇聽啫。

打字係方便人，錄音係方便自己。重要野，打字講重點啦。唔識打字，有個掣係可以將語音轉成文字的。

科技永遠都係便利人類，搞到唔便利既永遠都係人類自己。





《俾你一個LIKE》

係呢個「唔使急，最緊要快」既社會，就算在群組討論，都要快靚正。

正所謂一圖勝千言，言簡而意賅已是「必備」條件。

講得好的，自然留個「心心」或「姆指」，撞著長輩圖，自然「膠都費事派」。

久而久之，有種港媽，竟然發展出一套「俾LIKE經濟」。就係幫襯完人，之後想唔俾錢，Facebook俾LIKE就得。咁樣睇，佢個LIKE真係值錢過Bitcoin。

換轉係佢在群組曬自己「食玩愛」（Eat Play Love），你俾個LIKE佢，佢就話你敷衍佢。大佬，乜唔係LIKE可以當Bitcoin使咩？

又有一種人，好鍾意轉貼野，留低條新聞LINK，就揮揮衣袖不帶走一片雲彩。大佬，新聞我自己都有睇。呢種人，完全唔知佢想表達啲乜。

「乜你地唔覺得離譜咩？」

貼完LINK，留一、兩行Comment啦！否則，人地鬼知你支持定反對？好學唔學，學埋班廢物高官，又要講又怕俾人清算。準備貼完LINK柒左，就話「貼文不代表本人立場」？想包剪鎚玩彈弓手？

有啲野，可能講求效率，唔使下下做足滿分。有啲野，涉及是非黑白，社會公義，就最好睇清睇楚，唔好求其望下個標題，派個LIKE就算。